Logo

५ जेष्ठ २०८१, शनिबार

झापा, १५ कात्तिक : बजेट अभावमा पाडाजुङ्गी–गौरीगञ्ज सडक निर्माण रोकिएर अलपत्र परेको छ । सडकको करिब ६० प्रतिशत काम पूरा भएपछि निर्माण कार्य रोकिएको सडक डिभिजन कार्यालय दमकले जनाएको छ ।

कार्यालयका सूचना अधिकारी गौतमकुमार देवका अनुसार विसं २०७९ चैतमा साढे तीन किलोमिटर चार लेनको सडक निर्माण गर्ने गरी खरीढुङ्गा–माङ्वा–पूर्वाञ्चल जेभीले सम्झौता गरेको थियो । गत असोज २० गते निर्माण सम्पन्न गर्ने गरी रु ११ करोड ७० लाखमा ठेक्का लिएको कम्पनीको ढिलासुस्तीका कारणसमेत बजेटमा समस्या भएको उहाँले बताउनुभयो ।

“गत आर्थिक वर्षमै काम सकेको भए बजेटको समस्या हुने थिएन”, उहाँले भन्नुभयो, “चालु आर्थिक वर्षमा अर्थ मन्त्रालयमा यस सडक निर्माणको बजेट समावेश नहुँदा समस्या भएको हो । पहल गरिरहेका छौँ ।”

उहाँले पूर्वपश्चिम राजमार्गसँग सीमा जोडिएको कमल गाउँपालिका–६ मा बन्दै गरेको सडकको सबै काम पूरा भए पनि बजेट अभावमा कालोपत्र गर्न नसकिएको बताउनुभयो । उहाँका अनुसार ठेकेदार कम्पनीले रु छ करोड ५० लाख भुक्तानी पाइसकेको बताउनुभयो ।

पुरानो कालोपत्रे भत्काएर नयाँ निर्माणको कामसमेत नभएपछि हाल धुलोका कारण स्थानीयवासी हैरान भएका छन् । दुर्घटनाको जोखिम बढ्नुका साथै ज्येष्ठ नागरिक, बालबालिका, बिरामीलाई थप समस्या परेको स्थानीयवासीको भनाइ छ ।

सूचना अधिकारी देवले सडक बन्द गराउन र खुलाउन भन्दै दैनिकजसो सडक डिभिजन कार्यालय दमकमा ज्ञापनपत्र लिएर स्थानीयवासी, जनप्रतिनिधि आइरहेको बताउनुभयो । उहाँले सो सडकको निर्माण कार्य पूरा गर्नका लागि सङ्घीय सरकारको भौतिक पूर्वाधार तथा अर्थमन्त्रालयमा फाइल समावेश गरी बजेट निकासाका लागि पहल गरिरहेको बताउनुभयो ।

राष्ट्रिय समाचार समिति (रासस)

प्रकाशित मिति: १५ कार्तिक २०८०, बुधबार

Leave a Reply

Your email address will not be published. Required fields are marked *